THE SON OF THE KHMER EMPIRE Be informed that FB Account Sokheoun Pang is Fake Created by CPP Supporter​ to Defame and Complicate Me. Mine is Khmer Sovannaphumi

​​​បើខ្មែរមានមេដឹកនាំល្អ​​​ ខ្មែរអាចធ្វើអ្វីក៏បានដែរ!

ព្រះរាជាណាចក្រអច្ឆរយ៖ ព្រឹត្តិការណ៍​គួរ​ឲ្យ​ហួសចិត្ត ខ្លាច និង​មិនគួរ​ឲ្យ​ជឿ ​ប្រចាំ​សប្តាហ៍​

leave a comment »


(ថ្ងៃទី 29 កក្កដា 2012, ម៉ោង 10:36:AM) | ដោយ: លីនណា
ប្រភព៖ CEN

​ភ្នំពេញ: តើ​លោក​អ្នកដឹង​ទេ​ថា មួយ​សប្តាហ៍​កន្លងទៅនេះ មានរឿង​ប្លែកៗ និង​រន្ធត់​មួយចំនួន ដែល​ខ្លះ​ជា​រឿង​គួរ​ឲ្យ​ហួសចិត្ត និង​ខ្លះទៀត​គួរ​ឲ្យ​រន្ធត់​។​

​ខាងក្រោម​នេះ ជា​រឿង​ប្លែកៗ ឬ​គួរអោយ​រន្ធត់ នា​សប្តាហ៍​កន្លងមក ៖

១. ស្លាប់​៤​នាក់ របួសធ្ងន់​៥​នាក់​ ក្នុងករណីបាញ់​គ្នា​រវាង​សមត្ថកិច្ច និង​ក្រុមចោរ ប្លន់​ទូ​មាស​​ នៅ​ផ្សារ​ពួក ខេត្តសៀមរាប​ឆាកប្រយុទ្ធ​បាញ់​តដៃ​គ្នា រវាង​កម្លាំង​សមត្ថកិច្ច​មាន​នគរបាល កងរាជអាវុធហត្ថ និង​តំបន់​ប្រតិ​ប​ត្ដិ​ការ​សឹក​រង​ខេត្ដ ជាមួយ​ក្រុមចោរប្លន់ ដែល​លទ្ធផល​ត្រូវបាន​គេ​រាយការណ៍​នៅ​ព្រលប់​ថ្ងៃទី​២៣ ខែកក្កដា ឆ្នាំ​២០១២​ ថា ក្រុមចោរ​ត្រូវ​សមត្ថកិច្ច​បាញ់​ឱ្យស្លាប់​នៅនឹងកន្លែង​ចំនួន ៣​នាក់ និង​របួសធ្ងន់​ម្នាក់​។ ដោយឡែក ​ប្រជាពលរដ្ឋ​ម្នាក់ ត្រូវបាន​ក្រុមចោរ​បាញ់សម្លាប់ និង ​៣​នាក់​ទៀត​រងរបួស ខណៈពេលដែល​ប្រជាពលរដ្ឋ​រងគ្រោះ​ទាំងនោះ ត្រូវបាន​ក្រុមចោរ​ចាប់​ជា​ចំណាប់ខ្មាំង​។ ជាមួយគ្នានោះ ​ប៉ូលិស​ម្នាក់ត្រូវបាន​ក្រុមចោរ​ជិះ​បំ​បុក​ឱ្យ​បាក់​ភ្លៅ​ខាងស្ដាំ​ផងដែរ​។​

​ហេតុការណ៍​បាញ់ប្រហារ កើតឡើង​នៅ​ម៉ោង ​១២ ​ថ្ងៃត្រង់​ ថ្ងៃទី​២៣ ខែកក្កដា ឆ្នាំ​២០១២ ស្ថិតនៅក្នុង​ផ្សារ​ពួក មាន​ទីតាំង​ក្នុងភូមិ​អូរ​តា​ប្រាក់ ឃុំ​ពួក ស្រុក​ពួក ខេត្ដ​សៀមរាប មាន​ករណី​ប្លន់​ប្រដាប់អាវុធ​អ្នកលក់​មាស​ចំនួន​ពីរ​តូប​។ ក្រុមចោរ​បាន​ប្លន់​យក​មាស​ជនរងគ្រោះទាំង​ពីរតូប ហើយ​គេចខ្លួន​ជាមួយនឹង​រថយន្ដ​មួយគ្រឿង និង​ម៉ូតូ​មួយ​គ្រឿង​។ ចោរ​ទាំង​បួន​នាក់ មាន​ម្នាក់​រស់នៅ​ស្រុក​អន្លង់វែង ខេត្ដ​ឧត្ដរមានជ័យ និង​បីនាក់​ទៀត​រស់នៅ​ស្រុក​កំពង់រោទិ៍ ខេត្ដ​ស្វាយរៀង។

២. ឃាត់ខ្លួន​ចោរ ៤​នាក់ បាញ់​ប្លន់​នៅ​ផ្សារ​ពុទ្ធ​តា​សត ខេត្តបន្ទាយមានជ័យ​

​មាន​ករណី​ប្លន់​ប្រដាប់អាវុធ​មួយ បាន​កើតឡើង​សាហាវ ដោយ​ក្រុមចោរ​ប្រដាប់​ដោយ​កាំភ្លើង​គ្រប់​ដៃ បាញ់​តទល់​ជាមួយ​សមត្ថកិច្ច​ចម្រុះ ដើម្បី​ប្លន់​ទ្រព្យសម្បត្តិ គ្រឿងអលង្ការ​។ ករណី​ប្លន់​ប្រដាប់អាវុធ​នេះ បាន​កើតឡើង​កាលពី​វេលា​ម៉ោង ៤ និង ៣០នាទី រសៀលថ្ងៃទី​២៣ ខែកក្កដា ឆ្នាំ​២០១២ នៅ​ផ្សារ​ពុទ្ធ​តា​សត ឃុំ​កូប ស្រុក​អូរជ្រៅ ខេត្តបន្ទាយមានជ័យ​។​

​ក្រោយ​ការបាញ់​តទល់​ប្រហែល​មួយ​ម៉ោង រវាង​ក្រុមចោរ និង​សមត្ថកិច្ច គឺ​បាន​ឃាត់ខ្លួន​ជនសង្ស័យ ៣នាក់ និង​តាម​ចាប់ជនសង្ស័យម្នាក់ ​ដែល​កំពុង​បាញ់​តដៃ ជាមួយ​សមត្ថកិច្ច​នៅក្នុង​វត្ត​រតន​និមិត្ត ក្នុង​ឃុំ​កូប ស្រុក​អូរជ្រៅ​។ កម្លាំង​សមត្ថកិច្ច​បាន​ឃាត់​រថយន្ត​ជនល្មើស ម៉ាក​កាមរី ៩៥ និងកាំភ្លើងខ្លីពីរ​ដើម ព្រមទាំងកាំភ្លើងអាកា​មួយដើម​ផងដែរ​។

៣. ភ្លើង​លេប​ត្របាក់​ផ្ទះ​ និង​តូបជិត​ ១០០ នៅ​ផ្សារ​ទួល​សង្កែ​

​នៅ​ផ្សារ​ទួលសង្កែ ខាងជើង​ស្តា​ត​ចាស់ ត្រូវបាន​កម្ទេច​ដោយ​អគ្គីភ័យ​ កាលពី​រសៀល​ថ្ងៃទី​២៣ ខែកក្កដា ឆ្នាំ​២០១២ ស្ថិតនៅ​តាមផ្លូវ​លេខ​៩០០ ក្នុង​សង្កាត់​ទួល​សង្កែ ខណ្ឌឫស្សីកែវ​។ លោក ទូច ណារ៉ុថ ស្នងការ​ប៉ូលិស​រាជធានី​ភ្នំពេញ​ បាន​និយាយថា គេ​មិនទាន់​ដឹង​មូលហេតុ​ពិតប្រាកដ​នៅឡើយ​ទេ ចំពោះ​អគ្គីភ័យ​នេះ​។ ប៉ូលិស​កំពុងតែ​ស៊ើបអង្កេត​។ ប៉ុន្តែ​ទោះបីជា​យ៉ាងណាក្តី ​ភ្លើង​បាន​រលត់​នៅ​ម៉ោង ​៤ ​និង ​៣០​នាទី បន្ទាប់ពី​វា​បាន​បំផ្លាញ​ផ្ទះ និង​តូប​ផ្សារប្រហែល ​១០០ រួច​ម​មក​។​

​អាជីវករ​នៅក្នុង​ផ្សារ​ទួល​សង្កែ​បាន​ឲ្យ​ដឹងថា ដំបូង​គេ​បាន​ឭ​សំឡេង​ផ្ទុះ​ធុង​ហ្គាស នៅក្នុង​ផ្សារ​ទួល​សង្កែ បណ្តាលអោយ​មនុស្ស​ប្រុស​ស្រី​ពីរនាក់ ដួលសន្លប់ និង​បុរស​ម្នាក់​រងរបួស​រលាក​ជើង​បន្តិចបន្តួច​។ ផ្សារ​នេះ​មាន​តូប​ចំនួន ២៣៨​តូប ត្រូវ​អគ្គីភ័យ​ឆេះ​បំផ្លាញអស់​ចំនួន ៨​តូប ត្រូវ​សមត្ថកិច្ច​រុះ​រើស​ចេញ​កុំ​ឲ្យ​មានការ​ឆាបឆេះ​បន្ត អស់​ចំនួន​ ១៦​តូប​។

៤. កំពុង​ឈរ​មើល​គេ​លេង​បាល់ទះ ត្រូវ​ជន​មិន​ស្គាល់មុខ​ពីរ​នាក់​ជិះ​ម៉ូតូ​មក​កាប់​ស្លាប់​

​យុវជន​ម្នាក់​កំពុង​ឈរ​មើល​គេ​លេង​បាល់ទះ ត្រូវបាន​ជន​មិន​ស្គាល់មុខ ២​នាក់​ ជិះ​ម៉ូតូ​វីវ៉ា​មួយគ្រឿង​ លប​កាប់​មួយ​កាំបិត​ចំក​ចំហៀង​ខាងស្ដាំ កាលពី​វេលា​ម៉ោង ៦ និង​ ២០​នាទី ល្ងាចថ្ងៃទី​២១ ខែកក្កដា ឆ្នាំ​២០១២ ស្ថិតនៅ​ចំណុច​តារាង​បាល់ទះ​មួយកន្លែង ស្ថិតនៅ​ក្នុងភូមិ​ស្វាយដង្គំ សង្កាត់​ស្វាយដង្គំ ក្រុង​-​ខេត្ដ​សៀមរាប​។​

​ជនរងគ្រោះ​ដែល​ត្រូវគេ​កាប់​ស្លាប់​នោះ​ មានឈ្មោះ​ ឈុន ប៊ុន​ឆេង ភេទ​ប្រុស អាយុ​២៤​ឆ្នាំ មាន​ទីលំនៅ​ភូមិ​ទ្រៀក សង្កាត់​សៀមរាប ក្រុង​-​ខេត្ដ​សៀមរាប​។ ជនរងគ្រោះ​ត្រូវបាន​ជន​មិន​ស្គាល់​មុខ ​កាប់​មួយ​កាំបិត​ចំក​ខាងស្ដាំ ដាច់​ដល់​ឆ្អឹង និង​មាន​ប្រវែង ​១​តឹក ៥​លី​។

៥. ស្រវឹង​ទាំង​ព្រលឹម បើករថយន្ត​កូរ៉េ​បុក​ដើម​អង្កាញ់ រួញ​មុខ​

​អ្នកបើកបរ​ស្រវឹងធ្លាក់ភ្នែក​ម្នាក់ បាន​បញ្ជា​រថយន្ត​កូរ៉េ​ទៅបុក​ដើម​អង្កាញ់​ទាំង​ព្រលឹម បណ្តាល​ឲ្យ​ខ្ទេច​មុខ កាលពី​វេលា​ម៉ោង ៥ ព្រឹក​ថ្ងៃទី​២៤ ខែកក្កដា ឆ្នាំ​២០១២ នៅ​ចំណុច​មុខផ្ទះ​លក់​គ្រឿងសំណង់ លេខ​៨៩A ផ្លូវ​លេខ​៦៣ កែង​ផ្លូវ​១៧២ ក្នុង​សង្កាត់​បឹងរាំង ខណ្ឌដូនពេញ​។

​រថយន្ត​បង្ក​ម៉ាក Ssung yong Rexton បើកបរ​បុរស​ម្នាក់​ឈ្មោះ ប្រាក់ ចាន់​ដា​រ៉ា អាយុ ២៤​ឆ្នាំ ជា​អ្នករកស៊ី ស្នាក់នៅ​ខណ្ឌ​៧​មករា បាន​រងរបួស​ស្រាល តែ​រថយន្ត​ត្រូវ​រង​ការខូចខាត​រួញ​មុខ​ខ្ទេច។

៦. ស្រវឹង​បើកឡាន​ប៉ះ​ម៉ូតូ មិន​ចុះ​មើល បើក​រត់ ក្រឡាប់​ស្លាប់​ម្នាក់ របួសធ្ងន់​ម្នាក់​

​រថយន្ត​មួយគ្រឿង​ដែល​បញ្ជា​ដោយ​បុរស​ម្នាក់​មាន​សភាព​ស្រវឹង ទៅ​ប៉ះ​ម៉ូតូ​មួយគ្រឿងបន្តិចបន្តួច​ តែ​មិន​ព្រម​ចុះ​មើល បែរជា​បើករ​ត់ទៅ​ក្រឡាប់ បណ្តាល​ឲ្យ​បុរស​ម្នាក់​ស្លាប់​ភ្លាមៗ​នៅ​កន្លែងកើតហេតុ កាលពី​វេលា​ម៉ោង ១២ ​រំលងអធ្រាត្រ ឈានចូល​ថ្ងៃទី​២៤ ខែកក្កដា តាមផ្លូវ​លេខ​២០១១ សង្កាត់​ក្រាំងធ្នង់ ខណ្ឌ​ពោធិ៍​សែន​ជ័យ​។​

​សមត្ថកិច្ច​បាន​ឲ្យ​ដឹងថា រថយន្ត​បង្កហេតុ ប្រភេទ​តូយ៉ូតា​កាមរី  ពណ៌​ទឹកប្រាក់ ពាក់​ស្លាក​ ភ្នំពេញ 2A-5247 ។ អ្នកបើកបរ​ស្លាប់​ភ្លាមៗ​នៅ​ក​ន្លែ​ងកើតហេតុ និង​អ្នករួមដំណើរ​រងរបួស​ធ្ងន់​។ ពួកគេ​បាន​បើករថយន្ត​រត់ បន្ទាប់ពី​បាន​បុក​ម៉ូតូឈ្មោះ យ៉ា ចាន់ អាយុ​ ៤៨​ឆ្នាំ ជិះ​ម៉ូតូសេ​១២៥ ស៊េរី​២០០៧ ពណ៌​ខ្មៅ ដោយ​បណ្តាល​ឲ្យ​របួសស្រាល​។

៧. ជនបរទេស​ម្នាក់​ ត្រូវ​បាញ់សម្លាប់​ដោយ​ខ្មាន់កាំភ្លើង​បី​នាក់​

​បុរស​បរទេស​ម្នាក់ ត្រូវ​ជន​មិន​ស្គាល់​អត្តសញ្ញាណ​បាញ់ ​បណ្ដាល​ឲ្យ​ស្លាប់​ក្រោយពេល​បញ្ជូនទៅ​មន្ទីរពេទ្យ កាលពី​វេលា​ម៉ោង ១ ​និង​ ៥៥​នាទី រំលងអធ្រាត្រ ឈានចូល​ថ្ងៃទី​២៤ ខែកក្កដា ឆ្នាំ​២០១២ នៅ​ចំណុច​មុខផ្ទះ​លេខ​១៦ សង្កាត់​ទឹកល្អក់​ទី​៣ ខណ្ឌទួលគោក ក្បែរ​ច្រក​ចូលទៅ​សាលា​អង្គរ​ខេ​រា​អន្តរជាតិ ផ្លូវ​លេខ​២១០​។ ករណីនេះ​សង្ស័យ​ជា​ករណី​បាញ់​ប្លន់​មិនបាន​សម្រេច​។​

​សមត្ថកិច្ច​បាន​ឲ្យ​ដឹងថា ជនរងគ្រោះ​ឈ្មោះ ម៉ា​ស្សូ ហ្វ្រ​ង់ អាយុ ​៤៣​ឆ្នាំ ស្នាក់នៅ​ផ្ទះជួល ស្ថិតក្នុង​សង្កាត់​ទឹកល្អក់​ទី​៣ ខណ្ឌទួលគោក ត្រូវ​ក្រុម​ជនសង្ស័យ​បាញ់​ត្រូវ​មួយ​គ្រាប់​ចំ​ក្រោម​ដោះ​ខាងឆ្វេង​។ ចំណែក​ក្រុម​ជនសង្ស័យ​មាន​គ្នា ​៣​នាក់ ជិះ​ម៉ូតូ​ម៉ាក​ហុងដា សេ​១២៥ មិន​ស្គាល់​ស្លាក​លេខ ២​គ្រឿង​។

៨. ចាក់​បុរស​ម្នាក់​បី​កាំបិត របួសធ្ងន់ ប្លន់​យក​ម៉ូតូ​មួយគ្រឿង​ទៅ​បាត់​

​បុរស​ម្នាក់ បាន​ទ​ទួល​រងរបួស​ធ្ងន់ បន្ទាប់ពី​ត្រូវបាន​ជនសង្ស័យ​ ២​នាក់ ធ្វើ​សកម្មភាព​ចាក់ ៣​កាំបិត ​ចំ​ត្រង់​កញ្ចឹងក ប្លន់​យក​ម៉ូតូ កាលពី​វេលាម៉ោង ៩​ និង​​​ ៣០​នាទី​ យប់ ថ្ងៃទី​២៤ ខែកក្កដា ឆ្នាំ​២០១២ ត្រង់ចំណុចផ្លូវ​លេខ​១៩២៨ ភូមិ​ប៉ា​យ៉ាប សង្កាត់​ភ្នំពេញ​ថ្មី ខណ្ឌ​សែន​សុខ​។​

​សមត្ថកិច្ច​បានអោយដឹង​ថា ​ជនរងគ្រោះ​ឈ្មោះ ភួ​ន បូ​រិ​ន អាយុ ៤៨​ឆ្នាំ ​មុខរបររត់​ម៉ូតូឌុប ​ស្នាក់នៅ​ភូមិគោក​ឃ្លាង ​សង្កាត់​ភ្នំពេញ​ថ្មី ខណ្ឌ​សែន​សុខ​។ ម៉ូតូ​ដែល​ត្រូវ​ជនសង្ស័យ​ប្លន់​យកទៅ​បាត់ ម៉ាក​ស៊ុយ​ស៊ូ​គី​វីវ៉ា សេរី​៩៧ ពណ៌​ខ្មៅ ពាក់​ស្លាក​ ភ្នំពេញ 1BC- 6020​។ ចំណែក​ជនសង្ស័យមាន​គ្នា ២​នាក់ អាយុ​ប្រហែល ១៩ ទៅ ​២១​ឆ្នាំ ក្រោយពី​ធ្វើ​សកម្មភាព​ហើយ​បាន​យក​ម៉ូតូ​ជិះ​គេច​ខ្លួ​ន។

៩. តារាចម្រៀង ណាំ ប៊ុណ្ណា​រ័ត្ន និង​មិត្តភក្តិ​ ៥​នាក់ ក្រឡាប់​រថយន្ត​នៅ​ស្រុក​ព្រៃនប់​

​ប៉ូលិស​ស្រុក​ព្រៃនប់​បាន​និយាយថា រថយន្ត​មួយគ្រឿង​របស់​ក្រុម​តារាចម្រៀង បាន​ក្រឡាប់​ដោយ​ខ្លួនឯង តាំងពីព្រឹក​ព្រលឹម នៅ​ចំណុច​ផ្លូវបត់​កោង ចន្លោះ​គីឡូម៉ែត្រ​លេខ​១៧៥-១៧៦ ក្នុងភូមិ​វាល​ធំ ឃុំ​ជើងគោ ស្រុក​ព្រៃនប់ ខេត្ត​ព្រះសីហនុ បណ្តាល​ឲ្យ​អ្នកជិះ​ក្នុង​រថយន្ត​ចំនួន ៦​នាក់ រងរបួស​ធ្ងន់​ស្រាល ត្រូវបាន​ដឹកបញ្ជូន​ទៅ​សង្គ្រោះ​នៅ​រាជធានី​ភ្នំពេញ​ភ្លាមៗ​។ រថយន្ត​ដែល​ក្រឡាប់​ម៉ាក​កាមរី (​ឆ្លាម​) ពណ៌​ខ្មៅ ពាក់​ស្លាក ភ្នំពេញ E-8783​។​

​ប៉ូលិស​ប៉ុស្តិ៍​ជើងគោ​បាន​ប្រាប់ថា ក្នុងចំណោម​អ្នករងគ្រោះ​នោះ គេ​ឃើញ​មាន​តារាចម្រៀង​វ័យក្មេង​ម្នាក់ ឈ្មោះ ណាំ ប៊ុណ្ណា​រ័ត្ន បាន​រងគ្រោះ​បាក់​ភ្លៅ​ខាងឆ្វេង ក្រៅពីនោះ​ក៏មាន​ស្ត្រី​ម្នាក់​បាក់ឆ្អឹង​ជំនីរ និង ៤​នាក់​ទៀត​របួសស្រាល​។

១០. កុមារ​បីនាក់​បាន​ស្លាប់​ ដោយសារ​ខ្យល់ព្យុះ VISENTE

​គ្រួសារ​មួយក្រុម​បានធ្វើ​ដំណើរ ត្រឡប់​មកពី​ទីក្រុង​សៀមរាប ដោយ​ជិះ​កាណូត តាមផ្លូវ​បឹង​ទន្លេសាប ត្រូវបាន​ខ្យល់​បោកបក់​លិច​ទូក​បណ្ដាល​ឲ្យ​ស្លាប់​កុមារ​បីនាក់ ហើយ​បាន​រកឃើញ​សាកសព​កុមារ​ម្នាក់ ក្រោយពី​កើតហេតុ និងសព​ពីរ​នាក់ទៀត​បាត់​ខ្លូន​។ ពួកគេ​រងគ្រោះថ្នាក់ ខណៈដែល​កម្ពុជា​កំពុងស្ថិត​នៅក្រោម​សម្ពាធ​ខ្យល់ព្យុះ VISENTE​។​

​ហេតុការណ៍​នេះបាន​កើតឡើង​នៅវេលា​ម៉ោងជាង ១១ ថ្ងៃទី​២៤ ខែកក្កដា ឆ្នាំ​២០១២ ស្ថិតនៅ​ចំណុចក្បាលជ្រោយ​គាំ ភូមិ​ដី​រនាត ឃុំ​មេទឹក ស្រុក​បាកាន​ ខេត្ត​ពោធិ៍សាត់។

​ប៉ូលិស​ស្រុក​បាកានបាន​ឲ្យ​ដឹងថា កា​ណូត​នោះជិះ​គ្នា ៧​នាក់ ក្នុងនោះ​ស្លាប់​បីនាក់​។ ប៉ូលិសបាន​បន្តទៀតថា សព​កុមារ​ទាំងពីរ​នាក់ដែល​បាត់​នោះ មិនទាន់​រកឃើញ​នៅឡើយទេ​រហូតមកដល់​ថ្ងៃនេះ​។

១១. បើក​ម៉ូតូ​បុក​រថយន្ត​ពីក្រោយ ស្លាប់​ពីរ​នាក់ របួសធ្ងន់​ម្នាក់ នៅ​ស្រុក​ត្បូងឃ្មុំ​

​យុវជន​ពីរ​នាក់​បាន​ស្លាប់​នៅ​កន្លែងកើតហេតុ និង​ម្នាក់ទៀត​របួសធ្ងន់ ខណៈពេល​ពួកគេ​បាន​បើក​ម៉ូតូ​មួយគ្រឿង ជិះ​គ្នា​បីនាក់ ទៅបុក​ពីក្រោយ​រថយន្ត​មួយគ្រឿង ដែល​បើក​ក្នុង​ទិស​ស្របគ្នា​។ គ្រោះថ្នាក់​ចរាចរណ៍​នេះកើតឡើង​នៅលើ​ផ្លូវជាតិ​លេខ​៧ ភូមិ​ស្រែ​ស្ងៀម ឃុំ​ជី​រោទិ៍​២ ស្រុក​ត្បូងឃ្មុំ ខេត្តកំពង់ចាម វេលា​ម៉ោង ១២ និង ៣០​នាទី រំលងអធ្រាត្រ ឈានចូល​ថ្ងៃទី​២៤ ខែកក្កដា ឆ្នាំ​២០១២​។​

​យុវជន​ពីរ​នាក់​ដែល​ស្លាប់ ឈ្មោះ ឆេង សុ​និ​ន អាយុ ២៣​ឆ្នាំ ជា​អ្នកបើក​ម៉ូតូ​ម៉ាក WAVE ពណ៌​ក្រហម អត់​ស្លាក​លេខ ស្នាក់នៅ​ភូមិ​សួង​កើត សង្កាត់​-​ក្រុង​សួង ខេត្តកំពង់ចាម និង​អ្នកជិះ​ខាងក្រោយ​ឈ្មោះ ខាត់ ពិសិដ្ឋ អាយុ ២៥​ឆ្នាំ ស្នាក់​ភូមិ​ល្វា​ធំ ឃុំ​ល្វា ស្រុក​ត្បូងឃ្មុំ ខេត្តកំពង់ចាម​។ ឯ​ម្នាក់ទៀត​ដែល​រងរបួស​ធ្ងន់​ឈ្មោះ ជួន សារុន អាយុ ២៣​ឆ្នាំ ស្នាក់នៅ​ស្រុក​មេសាង ខេត្តព្រៃវែង​។

១២. ឃាត់ខ្លួន​បុរស​ម្នាក់ ល្បួង​ក្មេងស្រី​ ១៣​ឆ្នាំ រំលោភ​បី​ថ្ងៃ​ជាប់​គ្នា​

​បុរស​ពោះម៉ាយ​ម្នាក់ អាយុ ៣៦​ឆ្នាំ ត្រូវ​ប៉ូលិស​ស្រុក​ប​វេ​ល​ឃាត់ខ្លួន តាម​បណ្ដឹង​ក្រុមគ្រួសារ​ក្មេងស្រី​រងគ្រោះ បន្ទាប់ពី​ដឹង​រឿងរ៉ាវ​ដែល​បុរស​នេះ​រំលោភ​ក្មេងស្រី​ម្នាក់ អាយុ ១៣​ឆ្នាំ បានសម្រេច​បី​ថ្ងៃ​ជាប់​គ្នា ខណៈដែល​ក្មេងស្រី​នេះ​មាន​សភាព​ស្លេកស្លាំង​។​

​ហេតុការណ៍​ចាប់រំលោភ​នេះ បាន​កើតឡើង​តាំងពី​ថ្ងៃទី​២១-២២-២៣ ខែកក្កដា ឆ្នាំ​២០១២ នៅ​ចំណុច​បឹង​ឡានធំ ស្ថិតក្នុង​ភូមិ​បឹង​ស្នួល ឃុំ​អំពិល​ប្រាំ​ដើម ស្រុក​ប​វេ​ល ខេត្តបាត់ដំបង ហើយ​នៅ​ថ្ងៃទី​២៥ ខែកក្កដា ឆ្នាំ​២០១២ ស្រាប់តែ​ប៉ូលិស​ចុះទៅ​ឃាត់ខ្លួន​ជនល្មើស​ដល់ផ្ទះ​កន្លែងកើតហេតុ យកមក​អធិការនគរបាល​ស្រុក​ប​វេ​ល​តែម្ដង​។​

​លោក ឌី សារ៉េត នាយផ្នែក​ព្រហ្មទណ្ឌ​ប៉ូលិស​ស្រុក​ប​វេ​ល បាន​ឲ្យ​ដឹងថា បុរស​ម្នាក់​ដែល​ប៉ូលិស​ឃាត់ខ្លួន​នេះ​ឈ្មោះ ឡុ​ក ណាក់ អាយុ ៣៦​ឆ្នាំ ជា​បុរស​ពោះម៉ាយ​។ ចំណែក​ក្មេងស្រី​រងគ្រោះ​ដោយ​អំពើ​រំលោភ មាន​អាយុ ១៣​ឆ្នាំ​។

១៣. មនុស្សម្នា​ភ្លូកទឹកភ្លូកដី ទៅរក​គ្រូពេទ្យ​បារមី​ទេវតា ព្យាបាល​ជំងឺ​១០០​មុខ

​មនុស្សម្នា​ដែល​អះអាងថា​មាន​ជំងឺ​ទីទៃ​ពីគ្នា រួមទាំង​មនុ​ស្សគ​ផង ស្ទើរ​ពី​គ្រប់​ច្រកល្ហក​ក្នុង​ខេត្តបន្ទាយមានជ័យ បាត់ដំបង សៀមរាប ឧ​ត្ត​រ​មានជ័យ បាន​ភ្លូកទឹកភ្លូកដី​ទៅ​ព្យាបាល​ជំងឺ ពី​គ្រូពេទ្យ​បារមី​ទេវតា​ព្យាបាល​ជំងឺ​១០០​មុខ បើទោះបីជា​គ្រូ​បារមី​នេះ ក្រុមមន្ត្រី​ជំនាញ អាជ្ញាធរ​ដែនដី និង​សមត្ថកិច្ច​ពាក់ព័ន្ធ បញ្ជាក់ថា គ្មាន​ប្រើ​ឱសថ​អ្វី​ក៏ដោយ​។​

​ពេល​លោកអ្នក​ធ្វើដំណើរ​ឆ្លងកាត់​ផ្លូវជាតិ​លេខ​៥ ភូមិសាស្ត្រ​ស្រុក​អូរជ្រៅ ខេត្តបន្ទាយមានជ័យ ដល់​ចំណុច​មុខ​វត្ត​ចាន់​ស៊ី​សាមគ្គី​រាម ភូមិ​វាំង​មួង ឃុំ​កូប នឹង​ឃើញ​រថយន្ត គោយន្ត ម៉ូតូ កង់ និង​មនុស្សម្នា​រាប់រយ​នាក់​ប្រមូល​ផ្តុំគ្នា ដើម្បី​រង់ចាំ​ការព្យាបាល​នោះ​។​

​លោក អ៊ិន ណា​រិ​ទ្ធ អាយុ ៣៤​ឆ្នាំ ដែលជា​គ្រូពេទ្យ​បារមី​ទេវតា ព្យាបាល​ជំងឺ​១០០​មុខ​នោះ បាន​ប្រាប់​គេហទំព័រ CEN ថា លោក​រស់នៅ​ភូមិ​-​ឃុំ​បាក់​ព្រា ស្រុក​ឯក​ភ្នំ ខេត្តបាត់ដំបង ហើយ​ចូលមក​វត្ត​ចាន់​ស៊ី​សាមគ្គី​ណា​រាម ឃុំ​កូប ស្រុក​អូរជ្រៅ ខេត្តបន្ទាយមានជ័យ​នេះ ជិត​បី​សប្តាហ៍​ហើយ ដើម្បី​ព្យាបាល​អ្នកជំងឺ និង​អ្នកមាន​បញ្ហា​សុខភាព​។

១៤. រថយន្ត​កុងតឺន័រ​ស្រា​បៀរ បើក​វ៉ា ជ្រុល​ទៅបុក​ម៉ូតូ កិន​ស្លាប់​ម្នាក់​

​បុរស​ម្នាក់​បាន​ស្លាប់​ភ្លាមៗ​នៅ​កន្លែងកើតហេតុ ដោយ​ត្រូវ​រថយន្ត​ដឹក​ស្រា​បៀរ របស់​ក្រុមហ៊ុនស្រា​បៀរ​អង្គរ វ៉ា​រថយន្ត​មួយគ្រឿង​ទៀត ជ្រុល​ទៅបុក​ម៉ូតូ​របស់​ជនរងគ្រោះ និង​កិន កាលពី​វេលា​ម៉ោង ៩ និង ១០​នាទី យប់​ថ្ងៃទី​២៥ ខែកក្កដា ឆ្នាំ​២០១២ តាមផ្លូវ​វេ​ង​ស្រេង ស្ថិត​ក្នុងភូមិ​ដំណាក់​ធំ សង្កាត់​ស្ទឹងមានជ័យ ខណ្ឌមានជ័យ​។​

​សមត្ថកិច្ច​បាន​ឲ្យ​ដឹងថា ជនរងគ្រោះ​ឈ្មោះ យឹម បឿន អាយុ ២៣​ឆ្នាំ ជា​អ្នករត់ម៉ូតូឌុប ស្នាក់នៅ​ម្តុំ​បឹង​ក្រពើ ក្នុងភូមិ​ដី​ថ្មី មាន​ស្រុកកំណើត​នៅ​ស្រុក​កៀនស្វាយ ខេត្តកណ្តាល មាន​ប្រពន្ធ​ឈ្មោះ ដាំ យ៉ា អាយុ ២០​ឆ្នាំ ជា​កម្មការិនី​កាត់ដេរ​។ ជនរងគ្រោះ​ជិះ​ម៉ូតូ​ម៉ាក​សង់​កូរ៉េ ពណ៌​ក្រហម ពាក់​ស្លាក ភ្នំពេញ 1R-2207។

១៥. រថយន្ត​សណ្តោង​លាយ​ស៊ីម៉ងត៍​បុក​ម៉ូតូ ស្លាប់​ម្នាក់ នៅ​ផ្លូវ​វេ​ង​ស្រេង​

​យុវនារី​ម្នាក់​បាន​ស្លាប់​ភ្លាមៗ​នៅ​កន្លែងកើតហេតុ ដោយសារ​គ្រោះថ្នាក់​ចរាចរណ៍​មួយ បង្កដោយ​រថយន្ត​សណ្តោង​លាយ​ស៊ីម៉ងត៍ បើក​បុក​ម៉ូតូ​ជិះ​ច្រាសទិស​គ្នា ហើយ​កិន​ជាប់​កង់​ក្រោយ កាលពី​វេលា​ម៉ោង ៩ និង ១០​នាទី ព្រឹក​ថ្ងៃទី​២៧ ខែកក្កដា ឆ្នាំ​២០១២ នៅតាម​បណ្តោយ​ផ្លូវ​វេ​ង​ស្រេង ស្ថិត​ក្នុងភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍​សែន​ជ័យ​។​

​សេចក្តីរាយការណ៍​ពី​កន្លែងកើតហេតុ​បាន​ឲ្យ​ដឹងថា នារី​រងគ្រោះ​ឈ្មោះ សុខ ព្រី​ន​ដា អាយុ ២២​ឆ្នាំ ស្នាក់នៅ​ភូមិ​គោក​ជាន់ សង្កាត់​ចោមចៅ ខណ្ឌ​ពោធិ៍​សែន​ជ័យ​។ ជនរងគ្រោះ​ជិះ​ម៉ូតូ​ម៉ា​កវី​វា ពណ៌​ខ្មៅ ពាក់​ស្លាក ភ្នំពេញ 1Y-0016 ជិះ​ម្នាក់ឯង ត្រូវ​រថយន្ត​ដឹក និង​លាយ​ស៊ីម៉ងត៍ បុក ហើយ​កិន បណ្តាល​ឲ្យ​ស្លាប់​ភ្លាមៗ​នៅ​កន្លែងកើតហេតុ​។ ចំណែក​ភាគី​ខាង​រថយន្ត​ម៉ាក​ហ៊ី​ណូ ជា​ប្រភេទ​រថយន្ត​លាយ​ស៊ីម៉ងត៍​សណ្តោង ពាក់​ស្លាក ភ្នំពេញ 3A-9154 អ្នកបើកបរ​គេចខ្លួនបាត់​។

១៦. ក្មេងប្រុស​ម្នាក់​ទៅ​មើល​គេ​រាំ​ក្នុងភូមិ ត្រូវ​ឃាតក​កាច់​បំបាក់​ក​ស្លាប់​

​ក្មេងប្រុស​ម្នាក់​បាន​ស្លាប់​ដោយសារ​អំពើ​ឃាតកម្ម បង្កឡើង​ដោយ​មនុស្ស​ជាច្រើន​នាក់ ដែល​បាន​វាយ និង​កាច់​បំបាក់​ក​សម្លាប់ ខណៈពេល​ទៅ​មើល​គេ​រាំ​កម្សាន្ត​នៅក្នុង​ភូមិ នា​យប់​ថ្ងៃទី​២៧ ខែកក្កដា ឆ្នាំ​២០១២ នៅ​ភូមិ​-​ឃុំ​គោក​រវាង ស្រុក​ជើងព្រៃ ខេត្តកំពង់ចាម​។​

​លោក​វរសេនីយ៍ត្រី ហេង វុទ្ធី អធិការ​ប៉ូលិស​ស្រុក​ជើងព្រៃ បាន​ឲ្យ​ដឹងថា ជនរងគ្រោះ​ឈ្មោះ ធឿន វិថី អាយុ ១២​ឆ្នាំ ស្នាក់នៅ​ភូមិ​-​ឃុំ​គោក​រវាង ស្រុក​ជើងព្រៃ ខេត្តកំពង់ចាម​។ ក្មេងរងគ្រោះ​ត្រូវបាន​ជនល្មើស​ជាច្រើន​នាក់​ព្រួត​គា្ន​វាយបំបាក់​ក​។​

​លោក​អធិការ​ស្រុក​ជើងព្រៃ​បាន​ឲ្យ​ដឹង​បន្តទៀតថា បន្ទាប់​ស្រាវជ្រាវ និង​ធ្វើ​កោសល្យវិច័យ សមត្ថកិច្ច​បាន​ឈានទៅដល់​កំណត់​មុខសញ្ញា​ជនដៃដល់​ហើយ ប៉ុន្តែ​មិនទាន់បាន​បញ្ចេញ​ឈ្មោះ​ទេ ទំនងជា​ពួកនេះ​បាន​រត់គេចខ្លួន​អស់ហើយ​។ លោក​បាន​បន្តថា ជនល្មើស​មិនមែន​មានតែ​ម្នាក់​ទេ អាចមាន​គ្នា​ពី​ពីរ​នាក់​ឡើងទៅ​។​

​តាម​ស៊ើបអង្កេត លោក​លោក​វរសេនីយ៍ត្រី ហេង វុទ្ធី បាន​អះអាងថា ករណីនេះ​ជា​រឿង​គំនុំ ប៉ុន្តែ​មិនដឹងថា​ជា​រឿង​អ្វី​ទេ​។

១៧. ឡាន​ខ្សាច់​បុក​ឡាន​ដឹក​កម្មករ រុល​ទៅបុក​កុងតឺន័រ ស្លាប់​ម្នាក់ របួស​ជាច្រើន​នាក់

​បុរស​ជា​កម្មករ​រោងចក្រ​ម្នាក់ បាន​ស្លាប់​ភ្លាមៗ​នៅ​កន្លែងកើតហេតុ និង​មាន​កម្មករ​កម្មការិនី​ជាច្រើន​នាក់​ទៀត បានទទួល​រងរបួស​ធ្ងន់​ស្រាល បន្ទាប់ពី​ជួប​គ្រោះថ្នាក់​ចរាចរណ៍ ដែល​បង្កឡើង​ដោយ​រថយន្ត​ដឹក​ខ្សាច់ បើក​ទៅបុក​រថយន្ត​ដឹក​កម្មករ រុល​ទៅបុក​គូទ​រថយន្ត​កុងតឺន័រ​បន្ថែមទៀត កាលពី​វេលា​ម៉ោង ៥ និង ៣០​នាទី ព្រឹក​ថ្ងៃទី​២៨ ខែកក្កដា ឆ្នាំ​២០១២ នៅ​ចំំ​ណុ​ច​នៅ​ជិត​ស្ពាន​៧​មករា មុខ​ផ្សារ​ក្រាំង​ពង្រ តាម​បណ្តោយ​ផ្លូវជាតិ​លេខ​៣ សង្កាត់​ក្រាំង​ពង្រ ខណ្ឌដង្កោ​។​

​សមត្ថកិច្ច​បាន​ឲ្យ​ដឹងថា រថយន្ត​បង្ក​ម៉ាក​ហ៊ី​ណូ ពណ៌​ខៀវ ពាក់​ស្លាក ភ្នំពេញ 3A-3812 ជា​រថយន្ត​ដឹក​ដីខ្សាច់ ចំណែក​រថយន្ត​ដឹក​កម្មករ ពាក់​ស្លាក ញ ២៧៥៩ ភព​២ ដោយ​ត្រូវ​រថយន្ត​ដឹក​ខ្សាច់​បុក រុល​ទៅបុក​គូទ​រថយន្ត​កុងតឺន័រ​មួយគ្រឿង​ទៀត មាន​ពណ៌​ត្រេអ៊ី ពាក់​ស្លាក ភ្នំពេញ 3A-4156​។ អ្នកបើករថយន្ត​បង្ក ក្រោយ​កើតហេតុ បាន​រត់​គេចខ្លួនបាត់​។ ក្នុង​ហេតុការណ៍​នេះ បណ្តាល​ឲ្យ​បុរស​ម្នាក់​ស្លាប់​ភ្លាមៗ​នៅ​កន្លែងកើតហេតុ ឈ្មោះ ឆាយ អាយុ ៣២​ឆ្នាំ រស់នៅ​ភូមិ​-​ឃុំ​អន្លង់​រមៀត ស្រុក​កណ្តាលស្ទឹង ខេត្តកណ្តាល​។

១៨. វាយ​គ្នា​មួយ​ប្រាវ ស្លាប់​យុវជន​ម្នាក់ និង​បញ្ជូនទៅ​តុលាការ​បីនាក់​

​យុវជន​ម្នាក់​ដែល​របួស​ក្បាល​ពីក្រោយ បាន​ស្លាប់​បន្ទាប់ពី​បញ្ជូនទៅ​សង្គ្រោះ​នៅ​មន្ទី​ពេទ្យ​បង្អែក​ខេត្ត​ប៉ៃលិន ខណៈដែល​យុវជន​ពីរ​ក្រុម​មាន​ជម្លោះ​នឹង​គ្នា ប្រើ​ដំបង​វាយ​ចំក្បាល​ពីក្រោយ​ជាច្រើន​ដំបង​។ ក្រោយ​ហេតុការណ៍​នេះ ប៉ូលិស​បាន​ឃាត់ខ្លួន​ក្រុម​ម្ខាង​ទៀត បាន​យុវជន​បីនាក់ យកមក​សាកសួរ​នៅ​ស្នងការដ្ឋាន​នគរបាល​ខេត្ត​ប៉ៃលិន​។​

​ហេតុការណ៍​នេះ​បាន​កើតឡើង​កាលពី​វេលា​ម៉ោង ៨ និង ១៥​នាទី យប់​ថ្ងៃទី​២៧ ខែកក្កដា ឆ្នាំ​២០១២ នៅ​ចំណុច​ហាង​កា​ហេ្វ​មួយកន្លែង ស្ថិតក្នុង​ភូមិ​ប៉ា​ហ៊ី​ខាងជើង សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន​។​

​លោក ឆ​ម វ៉ាន់​ធី នាយការិយាល័យ​ព្រហ្មទណ្ឌ​កម្រិត​ត​ធ្ងន់​នគរបាល​ខេត្ត​ប៉ៃលិន បាន​ឲ្យ​ដឹងថា យុវជន​ដែល​ស្លាប់​ឈ្មោះ យិន ធារ៉ា អាយុ ២១​ឆ្នាំ រងរបួស​ក្បាល​ជាច្រើន​ដំបង មាន​ទីលំនៅ​ភូមិ​-​សង្កាត់​ប​យ៉ា​ខា ក្រុង​-​ខេត្ត​ប៉ៃលិន​។ ចំណែក​យុវជន​បីនាក់​ដែល​ឃាត់ខ្លួន​នោះ ១. ឈ្មោះ លឹម ហុង​ឧ​ត្ត​ម អាយុ ១៥​ឆ្នាំ​, ២. ឈ្មោះ ផន សុ​ខេ​ត អាយុ ១៦​ឆ្នាំ ទាំងពីរ​នាក់​មាន​ទីលំនៅ​ភូមិ​បា​ហ៊ី​ត្បូង សង្កាត់​-​ក្រុង​-​ខេត្ត​ប៉ៃលិន និង​៣. ឈ្មោះ ស្រ៊ិ​ន ដាំ​រ៉ា ហៅ​ដាំ អាយុ ១៦​ឆ្នាំ មាន​ទីលំនៅ​ភូមិប​ឌិន​នៀវ សង្កាត់​-​ក្រុង​-​ខេត្ត​ប៉ៃលិន​។ ទាំងបី​នាក់​នេះ​ជា​សិស្សសាលា​វិទ្យាល័យ​ក្រុង​ទេព​និមិត្ត ហ៊ុន សែន ប៉ៃលិន​។

១៩. ស្លាប់​២​នាក់ របួស​៨​នាក់ ដោយសារ​គ្រោះថ្នាក់​ចរាច​ណ៍​នៅ​ស្រុក​បាទី​

​មនុស្ស ២​នាក់ បាន​ស្លាប់​នៅ​កន្លែងកើតហេតុ និង ៨​នាក់ រងរបួស​ធ្ងន់​ស្រាល ដោយសារ​គ្រោះថ្នាក់​ចរាចរណ៍​រវាង​រថយន្ត និង​រថយន្ត បើកបរ​ក្នុងទិសដៅ​ច្រាសទិស​គ្នា នៅតាម​បណ្តោយ​ផ្លូវជាតិ​លេខ​២ ចន្លោះ​បង្គោលគីឡូម៉ែត្រ​លេខ​៣៤-៣៥ ស្ថិត​ក្នុងភូមិ​ទន្លេបាទី ឃុំ​ក្រាំងធ្នង់ ស្រុក​បាទី ខេត្តតាកែវ កាលពី​ព្រឹក​ថ្ងៃទី​២៧ ខែកក្កដា ឆ្នាំ​២០១២ វេលា​ម៉ោង ៥ និង ២០​នាទី​។​

​លោក ង៉ាន់ សារី អធិការ​ស្រុក​បាទី បាន​ឲ្យ​ដឹងថា រថយន្ត​នីសា​ន់ ពណ៌​ត្រេអ៊ី​លា​យស ពាក់​ស្លាក តាកែវ 3A-0199 បើកបរ​ដោយ​ឈ្មោះ នួន ឡា ភេទ​ប្រុស អាយុ ១៨​ឆ្នាំ មាន​ទីលំនៅ​ភូមិ​ស្វាយជ្រំ ឃុំ​ចំបក់ ស្រុក​ស្វាយជ្រំ ខេត្តស្វាយរៀង (​គ្មាន​របួស​) បាន​បើករថយន្ត​ទៅ​ប៉ះ​នឹង​កញ្ចក់​ចំហៀង​រថយន្ត​មួយគ្រឿង​ទៀត ម៉ាក​ហ៊ីយ៉ាន់ដាយ ពណ៌​ស ពាក់​ស្លាក ភ្នំពេញ 3A-6203 បើកបរ​ដោយ​ឈ្មោះ ញ៉ ធុច ភេទ​ប្រុស អាយុ ២៨​ឆ្នាំ មាន​ទីលំនៅ​ភូមិ​ស្ត​ក​ប្រិ​យ៍ ឃុំ​ត្រពាំង​សាប ស្រុក​បាទី ខេត្តតាកែវ​។

​គ្រោះថ្នាក់​ចរាចរណ៍​នេះ​បណ្តាល​ឲ្យ​កម្មករ​កម្មការិនី​ស្លាប់ ២​នាក់ របួសធ្ងន់​ម្នាក់ របួសស្រាល ៧​នាក់ ក្នុងនោះ​មានឈ្មោះ ឆន ណុប ភេទ​ប្រុស អាយុ ១៦​ឆ្នាំ មាន​ទីលំនៅ​ភូមិ​ត្រពាំង​ទឹម ឃុំ​ត្រពាំង​សាប ស្រុក​បាទី និង​ឈ្មោះ អំ សេន ភេទ​ប្រុស អាយុ ១៩​ឆ្នាំ នៅ​ភូមិ​ចក ឃុំ​ត្រពាំង​សាប ស្រុក​បាទី បែកក្បាល​ហូរ​ខួរ​ចេញមកក្រៅ ស្លាប់​ភ្លាមៗ​នៅ​កន្លែងកើតហេតុ​, ឈ្មោះ ជា ណែ​ត ភេទ​ស្រី អាយុ ១៩​ឆ្នាំ រងរបួស​ធ្ងន់​, ឈ្មោះ យឿ​ង បូរី ភេទ​ស្រី អាយុ ២២​ឆ្នាំ​, ឈ្មោះ សួន ប៉ូ ភេទ​ស្រី អាយុ ១៨​ឆ្នាំ​, ឈ្មោះ សួន ឌី ភេទ​ស្រី អាយុ ១៨​ឆ្នាំ​, ឈ្មោះ ជា ផានិត ភេទ​ស្រី អាយុ ២១​ឆ្នាំ​, ឈ្មោះ ហេង សុ​បិ​ន្ត ភេទ​ស្រី អាយុ ២១​ឆ្នាំ​, ឈ្មោះ ពួន សូរិយា ភេទ​ស្រី អាយុ ១៩​ឆ្នាំ និង​ឈ្មោះ ហេង សំបូរ ភេទ​ស្រី អាយុ ១៩​ឆ្នាំ​។ អ្នក​ទាំង ៨​នាក់ រងរបួស​សម្រាក​ព្យាបាល​នៅ​មន្ទីរពេទ្យ​៕​​ K

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 5,394 other followers

%d bloggers like this: