លក់គ្មានសល់ និងមិនគួរឲ្យជឿ៖ផ្ទះតា ម៉ុក នៅតាកែវនឹងក្លាយជាសាកលវិទ្យាល័យឯកជន
សំគាល់៖ ផ្ទះនេះមានទីតាំងល្អឥតខ្ចោះ នៅកណ្តាលបឹង ខែវស្សាព័ទ្ធទៅដោយទឹកបឹងតាកែវ ផ្កាឈូករហង់ និងជាទីតាំង ប្រវត្តិសាស្រ្តថែមទៀត អាចទុកជាតំបន់ទេសចរណ៍រកចំណូលចូលជាតិមិនទេ… សោកស្តាយ!
Wednesday, 29 August 2012 ម៉ៃ ទិត្យថារ៉ា – Stuart White
Source: Phnom Penh Post
ភ្នំពេញៈ ទីតាំងផ្ទះអតីតកម្មាភិបាលរបបខ្មែរក្រហម ដែលជារដ្ឋាភិបាលមានឈ្មោះល្បីល្បាញខាងសម្លាប់បញ្ញវន្ត អាចនឹងប្រែក្លាយទៅជាគ្រឹះស្ថានឧត្តមសិក្សាមួយ គឺសាកលវិទ្យាល័យបៀលប្រាយ(BBU)ដែលជារឿងមិនគួរឲ្យជឿ។ នេះបើតាមមន្ត្រីរដ្ឋបាលម្នាក់ បានឲ្យដឹងកាលពីថ្ងៃចន្ទ។
ប្រភពដដែល ដែលសុំមិនបញ្ចេញឈ្មោះ ដោយសារថាគាត់ពុំមានសិទ្ធិនិយាយអំពីបញ្ហានេះ បានឲ្យដឹងថា អតីតលំនៅដ្ឋានរបស់មេដឹកនាំចុងក្រោយក្នុងរបបខ្មែរក្រហម គឺលោក ឈិត ជឿន ដែលគេគ្រប់គ្នាស្គាល់ថា តា ម៉ុក នោះ បច្ចុប្បន្នត្រូវបានជួសជុលកែលម្អឡើងវិញហើយ ទុកសម្រាប់ជាទីតាំងសាកលវិទ្យាល័យនៅខេត្តតាកែវ នៅឆ្នាំសិក្សា ២០១២-២០១៣នេះ។
សាកលវិទ្យាធិការ នៃសាកលវិទ្យាល័យបៀលប្រាយ គ្រាន់តែបញ្ជាក់ប្រាប់ថា សាកលវិទ្យាល័យនេះគ្រោងនឹងពង្រីកសាខារបស់ខ្លួន។
លោក ជ័យ វីរៈ សាកលវិទ្យាធិការនៃសាកលវិទ្យាល័យបៀលប្រាយ បានមានប្រសាសន៍ថា ការចុះឈ្មោះរបស់សិស្សានុសិស្សនៅក្នុងឆ្នាំសិក្សាថ្មីនេះ នឹងក្លាយជាការចាំបាច់សម្រាប់ការពង្រីកទីតាំង តែពេលនេះការពង្រីកទីតាំងថ្មីនៅអតីតគេហដ្ឋានរបស់តា ម៉ុក នេះ គឺគ្រាន់តែជាពាក្យចរាមអារ៉ាមតែប៉ុណ្ណោះទេ។
លោក ឆាំង យុ ប្រធានមជ្ឈមណ្ឌលឯកសារកម្ពុជា ជាអង្គការដែលធ្វើការស្រាវជ្រាវពីរបបខ្មែរក្រហម បានមានប្រសាសន៍ដែរថា នឹងទាមទារយកផ្ទះនោះសម្រាប់បម្រើការដល់ការសិក្សារបស់បញ្ញវន្ត និងជួយឲ្យសិស្សានុសិស្ស បានយល់ដឹងឲ្យកាន់តែច្រើនអំពីរបបមួយដែលបានធ្វើទុកបុកម្នេញ ចំពោះបញ្ញវន្តយ៉ាងព្រៃផ្សៃ។
ដោយលើកឡើងពីសារៈសំខាន់នៃការរក្សាស្ថាបត្យកម្មដើមនិងការភ័យ ខ្លាចបាត់បង់ប្រវត្តិសាស្រ្តដ៏សំខាន់នេះ លោក ឆាំង យុ មានប្រសាសន៍ថា៖«ដើម្បីស្វែងយល់ពីប្រវត្តិសាស្រ្តនៃរបបខ្មែរ ក្រហម គឺយើងត្រូវចុះទៅពិនិត្យផ្ទាល់ដល់ទីកន្លែង»។
លោកបន្តថា៖«អ្នកអាចដឹងពីនយោបាយតាមរយៈស្ថាបត្យកម្ម ក៏ដូចជាអ្វីដែលខ្ញុំគិតដែរ វានឹងប្រាប់អ្នកនូវរឿងរ៉ាវជាច្រើនដែលពួកគេចង់ដឹង»។
មេបញ្ជាការភូមិភាគនិរតី ក្នុងរបបខ្មែរក្រហម ដែលមានឈ្មោះក្រៅថា តាម៉ុក និងជាអ្នកសម្លាប់សត្វ ត្រូវបានតែងតាំងជាមេបញ្ជាការទ័ពក្នុងរបបកម្ពុជាប្រជាធិបតេយ្យ ក្នុងឆ្នាំ ១៩៧៧ និងត្រូវបានរាយការណ៍ថា បានគ្រប់គ្រងក្រុមបោសសម្អាតផ្ទៃក្នុងទូទៅ ដើម្បីកម្ចាត់កម្មាភិបាលដែលមិនស្មោះត្រង់។
ក្រោយពីការដួលរលំរបបកម្ពុជាប្រជាធិបតេយ្យហៅរបបខ្មែរក្រហមនេះ មកទីបំផុតតា ម៉ុក បានលាចេញពីការគ្រប់គ្រងចលនារបស់ ប៉ុល ពត និងបានចូលរួមក្នុងសង្គ្រាមទ័ពព្រៃ រហូតដល់ត្រូវចាប់ខ្លួនក្នុងឆ្នាំ ១៩៩៩។
តា ម៉ុក បានស្លាប់ដោយវ័យជរារបស់គាត់ នៅមន្ទីរឃុំឃាំងក្នុងរាជធានីភ្នំពេញកាលពីខែកក្កដា ឆ្នាំ២០០៦។
ខុសពីមេដឹកនាំខ្មែរក្រហមឯទៀត ដែលមិនព្រមចុះចូលនឹងរដ្ឋាភិបាលនៅស្រុកអន្លង់វែង ផ្ទះរបស់តា ម៉ុក នៅខេត្តតាកែវ មិនត្រូវបានរាប់បញ្ចូលក្នុងតំបន់បែងចែកកាលពីខែសីហា ឆ្នាំ២០១១ តាមបញ្ជាលោកនាយករដ្ឋមន្ត្រី ហ៊ុន សែន ក្នុងការបង្កើតគណៈកម្មាធិការមួយ ដើម្បីប្រែក្លាយអគារដែលពាក់ព័ន្ធនឹងរបបខ្មែរក្រហម សម្រាប់ធ្វើជាតំបន់ទេសចរណ៍ប្រវត្តិសាស្រ្តនោះទេ៕ BP
Leave a comment